ဩဂုတ် ၆၊၂၀၂၅
GG (VOM)
ဖားကန့်မှာဖြစ်ပွားနေတဲ့ တိုက်ပွဲကြောင့် လက်နက်ကြီးကျရောက်ပေါက်ကွဲလို့ ဩဂုတ်လ ၅ ရက်နေ့ည ပိုင်းက လူသုံးယောက်သေဆုံးကာ ၁၃ ယောက်ထိခိုက်ဒဏ်ရာရရှိခဲ့ တယ်လို့ဒေသခံတွေဆီကသိရပါတယ်။
ဖားကန့်ရှိ ယူမာကျေးရွာ နဲ့ ရှရော်ခရွာမှာ ည ၇ နာရီလောက်က လက်နက်ကြီး ကျရောက်ပေါက်ကွဲ ခဲ့တာဖြစ်ကြောင်း ယူမာကျေးရွာက နှစ်ယောက်သေခဲ့ပြီး ၁၃ ယောက်ထိခိုက်ဒဏ်ရာရရှိခဲ့ကာ ရှရော်ခရွာမှ အမျိုးသားတယောက်သေဆုံးခဲ့ရတာဖြစ်တယ်လို့သိရပါတယ်။
“သေတာက ယူမာ ၊ စည်ပင်ရပ်ကွက်ကပါ။ အမျိုးသမီးနှစ်ယောက်သေတယ်။၁၃ ယောက်ထိခိုက်ဒဏ်ရာရတယ် ။ဒီနေ့ တနေ့ကုန်လက်နက်ကြီးပစ်ခတ်နေတာ။အိမ်ပေါ်တည့်တည့်တွေကျတာပါ။” လို့ ဒေသခံကပြောပါတယ်။
လက်ရှိမှာ ထိခိုက်ဒဏ်ရာရရှိသူတွေကို ဆေးကုသမှုပြုလုပ်နေကြောင်း ၊ ထိခိုက်ဒဏ်ရာရရှိသူတွေထဲမှာလည်း ဒဏ်ရာပြင်းထန်သူတွေပါတယ်လို့သိရပါတယ်။
ဖားကန့်ဒေသမှာဖြစ်ပွားနေတဲ့တိုက်ပွဲကြောင့် ဩဂုတ် ၃ ရက်နဲ့ ၄ ရက်နေ့တုန်းကလည်း မျောက်ဖြူရွာ ၊ရှရော်ခရွာနဲ့ ဆန်းကြွယ် ရွာဘက်ကို လက်နက်ကြီးကျရောက်ပေါက်ကွဲခဲ့လို့ အသက် ငါးနှစ်အရွယ်ကလေးအပါသုံးယောက်သေဆုံးကာ နောက်ထပ် ၁၀ ယောက်ထိခိုက်ဒဏ်ရာရရှိခဲ့ တယ်လို့သိရပါတယ်။
ပြီးခဲ့တဲ့ရက်ပိုင်းကမှ နလအ တပ်တွေက သိမ်းပိုက်လိုက်တဲ့ ဖားကန့် ဒေသ၊ ရှရော်ခရွာမှာရှိတဲ့ ညောင်ပင်ကုန်းကို ပြန်လည်ရရှိရေးအတွက် KIA ပူးပေါင်းတပ်တွေက ပြန်လည်ထိုးစစ်ဆင်တိုက်ခိုက်နေတာကြောင့် တိုက်ပွဲတွေ ဆက်လက်ပြင်းထန်နေတာဖြစ်ပါတယ်။
ဓာတ်ပုံ – ဒေသခံ
